A mellora da pista entre Gondar e Viveiro reforza a seguridade viaria en Xove
O Concello de Xove vén de finalizar os traballos de acondicionamento na pista que comunica o núcleo de Gondar, na parroquia de Monte, co municipio veciño de Viveiro. Esta intervención dá resposta a unha antiga demanda da veciñanza, especialmente de gandeiros e propietarios de fincas que atopaban grandes dificultades para acceder ás súas leiras, realizar tarefas agrarias ou mesmo chegar aos montes da súa propiedade.
A actuación incluíu o asfaltado integral do viario e a limpeza das cunetas, o que permitiu ampliar de maneira significativa a anchura da pista. Segundo destacan desde o Concello, esta mellora facilitará a circulación de vehículos e maquinaria pesada, ao tempo que reforzará a seguridade viaria nunha zona de tránsito habitual para a actividade agrícola e forestal.
Os traballos foron executados pola empresa Carferlo SL cun investimento total de 66.187 euros. Para acometer esta obra, o Concello contou cunha achega de 53.454 euros procedente de AGADER, dentro do programa Camiña Rural para o período 2025-2026. Esta iniciativa, impulsada pola Consellería de Medio Rural, busca modernizar e manter os camiños rurais mediante actuacións que melloren o firme, a seguridade e os accesos a parcelas de uso agrario.
Grazas á acollida ao programa, o Concello de Xove viu reducido de maneira notable o custo que debía asumir con fondos propios, o que supón un alivio para as arcas municipais e permite continuar avanzando na mellora das infraestruturas rurais do territorio.