A Mariña Patrimonio presentará os resultados das escavacións en Santo Estevo do Ermo en Barreiros
As Escolas Vellas de San Cosme de Barreiros (Anexo do edificio do Concello) serán o escenario o próximo domingo 30 de marzo, ás 19:00 horas, dunha conferencia na que se presentarán os resultados do proxecto de escavación levado a cabo en Santo Estevo do Ermo. Este proxecto foi impulsado por Mariña Patrimonio, a Fundación Eira da Xoana e a Irmandade de Santo Estevo, coa colaboración da Vicepresidencia da Deputación de Lugo e o Concello de Barreiros.
O director da escavación, Francisco Alonso Toucido, será o encargado de presentar os resultados das sondaxes e catas realizadas no pasado mes de outubro, que se centraron na localización dos restos da igrexa e das cabanas dos eremitas, que, segundo fontes históricas, se atopan neste lugar desde o século XII.
Daniel García, deputado da Vicepresidencia da Deputación de Lugo, visitou o xacemento nas últimas semanas xunto coa alcaldesa Ana Ermida, o concelleiro Dámaso Ratoeira e membros das asociacións que promoveron o proxecto. García subliñou a importancia de realizar este evento público e aberto á veciñanza para mostrar os avances da escavación e compartir o coñecemento adquirido, así como o valor natural e patrimonial de Santo Estevo do Ermo. O deputado tamén destacou que a Vicepresidencia manterá o seu apoio ás labores de estudo e divulgación que se realicen no xacemento.
A escavación, que se levou a cabo tras a adquisición dos terreos a través dunha campaña de micromecenado, contou co respaldo da Vicepresidencia da Deputación de Lugo, que, a través da súa colaboración anual con Mariña Patrimonio, destinou unha axuda de 6.000 euros para o financiamento das actividades do proxecto.