A Mariña Lucense aposta por un turismo sostible co impulso dos Plans de Sostibilidade Turística
O director de Turismo de Galicia, Xosé Merelles, participou na inauguración do Foro de Turismo e Sostibilidade A Mariña Lucense, un evento que busca promover un modelo turístico sostible e potenciar os recursos culturais e naturais da comarca. Durante a súa intervención, Merelles puxo en valor instrumentos como os Plans de Sostibilidade Turística en Destino (PSTD), que permiten definir o modelo de turismo que se quere impulsar na comunidade galega. “O obxectivo deste plan é impulsar un desenvolvemento turístico sostible na Mariña Lucense, poñendo en valor o seu patrimonio cultural e natural protexido para frear a perda demográfica nas áreas rurais dos 16 municipios”, afirmou.
O PSTD da Mariña Lucense, no que se enmarca o Foro, conta cun investimento global de 2,3 millóns de euros, dos que a Xunta financia 1 millón. Entre os seus obxectivos está a xestión dos fluxos turísticos no territorio, a loita contra o despoboamento rural, a mellora do nivel socioeconómico e a busca do equilibrio territorial. Ademais, o plan impulsa a dixitalización das infraestruturas e servizos turísticos existentes, así como o desenvolvemento de equipamentos e produtos seguros, innovadores e singulares.
Merelles destacou o compromiso da Xunta coa sostibilidade turística: “Desde o Goberno galego levamos anos asumindo o compromiso de traballar da man da sostibilidade turística. Facemos un esforzo constante para repartir a actividade turística polo territorio e durante todos os meses do ano”, explicou o director de Turismo.
Entre as ferramentas que se empregan para fomentar estes obxectivos, Merelles sinalou os Plans de Sostibilidade Turística en Destino e outras achegas económicas, como as subvencións para a mellora de infraestruturas turísticas en concellos de menos de 10.000 habitantes, dotadas con 2 millóns de euros, ou as liñas de actuación para melloras enerxéticas, dixitalización e embelecemento de fachadas en establecementos do litoral, coas que se destinan 5 millóns de euros.
O balance turístico da comarca é positivo. Entre xaneiro e xullo, A Mariña Lucense recibiu máis de 103.000 visitantes, un incremento do 1,8% respecto ao mesmo período de 2024, que realizaron un total de 205.000 pernoctacións, un 8,1% máis. Estes datos reflicten non só a relevancia da comarca como destino turístico, senón tamén o potencial que teñen as medidas de sostibilidade e planificación para consolidar un modelo de turismo respectuoso co medio e beneficioso para a economía local.