A Mariña inicia a implantación dun modelo pioneiro de experiencias agroturísticas sostibles
A Mancomunidade de Concellos da Mariña Lucense participou esta semana nas primeiras sesións de traballo para poñer en marcha na comarca o Modelo de Innovación Sostible de Experiencias Agroturísticas (MISEA), unha iniciativa promovida pola Secretaría de Estado de Turismo a través de SEGITTUR. A Mariña foi o único territorio galego seleccionado para este proxecto piloto, no que tamén colaboran a Deputación de Cáceres, Fuerteventura, o municipio tarraconense de Deltebre e Valencia, todos eles integrados na Rede de Destinos Intelixentes.
A presidenta da Mancomunidade, Rocío López, destacou que esta estratexia pretende “impulsar a implicación directa do sector primario no sistema turístico local”. O obxectivo é estruturar experiencias sostibles e atractivas que dean visibilidade aos produtos do territorio e, ao mesmo tempo, poidan xerar ingresos complementarios “sen alterar a actividade principal das explotacións agrícolas e gandeiras”, contribuíndo así a reforzar e diversificar a oferta turística da Mariña.
Como parte do proceso, os técnicos especializados encargaranse de ofrecer asesoramento a produtores vinculados á gastronomía e ao sector agroalimentario, orientándoos na creación e mellora de propostas turísticas. Ademais, elaborarán un plan de acción conxunto que permita integrar estas iniciativas no sistema turístico comarcal de maneira ordenada e estable.
Primeiras sesións de traballo
O programa botou a andar na Mariña o martes 25 de novembro cunha xornada inicial que reuniu persoal técnico da Mancomunidade e un grupo de dez produtores e pequenas empresas do territorio. A actividade estruturouse en dúas partes: unha reunión co chamado Grupo de Contraste e un taller formativo dirixido a axentes locais seleccionados para achegar unha visión ampla e representativa do sector.
No encontro do Grupo de Contraste participaron responsables de Turismo Slow Norte de Galicia, membros do Colectivo de Gastronomía da Mariña, representantes da Cooperativa Terras da Mariña e da IXP Faba de Lourenzá, o GDR Terras de Miranda, integrantes da mesa de calidade SICTED, unha axencia de viaxes e profesorado dos centros de formación IES de Foz e CFA Pedro Murias de Ribadeo. A súa aportación resultou clave para trasladar ao proxecto unha perspectiva local e práctica, baseada na experiencia e no coñecemento do territorio.
Pola súa banda, o primeiro obradoiro colectivo reuniu os dez produtores e pequenas empresas seleccionadas para traballar especificamente na creación de experiencias agroturísticas. A sesión, descrita como intensa e participativa, abordou cuestións como o papel do promotor como anfitrión, o deseño de propostas sostibles, o perfil do visitante, a identificación de boas ideas e a xestión adecuada das actividades. Ao longo desta semana, estes participantes recibirán asesoramento individualizado para avanzar nas iniciativas que desexen desenvolver ou perfeccionar.
Rocío López explicou que a implantación do modelo se prolongará ata o mes de abril, cun calendario de novas reunións grupais e acompañamento técnico personalizado. A presidenta subliña que este proceso permitirá “avanzar na creación de experiencias agroturísticas que contribúan a consolidar un modelo turístico máis sostible, inclusivo e baseado nos valores da Mariña Lucense”.