A Mariña impulsa unha Guía do Turista Responsable para fomentar un modelo sostible de viaxes
A Mancomunidade de Concellos da Mariña Lucense vén de presentar a Guía do Turista Responsable, un documento que recolle consellos prácticos para fomentar un turismo respectuoso co xeodestino e que busca concienciar sobre a necesidade de reducir os efectos negativos das viaxes nos lugares que se visitan.
Este manual sinxelo e accesible, elaborado no marco do proxecto de Estudos de Capacidade de Carga en once espazos de especial fraxilidade da comarca, enmárcase dentro do Plan de Sostibilidade Turística na Mariña Lucense 2022-2024, financiado pola propia Mancomunidade, a Xunta de Galicia e a Secretaría de Estado de Turismo.
A presidenta da entidade, Rocío López, destacou que se trata dunha ferramenta “orientada tanto ás persoas que nos visitan como aos propios axentes do sector, co obxectivo de favorecer un turismo máis sostible e responsable”. López engadiu que a guía “pretende ir máis alá dunha simple lista de recomendacións, xa que busca convidar a reflexionar sobre como viaxamos e de que maneira os nosos comportamentos condicionan a vida dos territorios e comunidades que coñecemos”.
O documento propón claves para viaxar dunha forma consciente, poñendo en valor a cultura local, apoiando a economía de proximidade, contribuíndo á conservación do patrimonio e do medio natural e apostando polo consumo de produtos e servizos sostibles.
A iniciativa pretende tamén cambiar a mirada sobre o turismo, deixando de ver só os riscos que implica e situando o foco nas oportunidades que ofrece, encamiñadas a un modelo de futuro no que viaxeiros e destino se beneficien mutuamente.
A guía completa pode consultarse a través da páxina web oficial da Mancomunidade da Mariña Lucense.