A Mariña esixe un médico a tempo completo para Ourol
A Plataforma Sanitaria da Mariña, xunto co alcalde de Ourol, entregou hoxe no rexistro do Hospital da Mariña preto de 1.200 sinaturas dirixidas ao xerente da Área Sanitaria de Lugo, A Mariña e Monforte, Ramón Ares. A iniciativa busca garantir a presenza dun médico no centro de saúde do municipio durante toda a xornada e todos os días laborables.
A totalidade da veciñanza de Ourol subscribiu esta reivindicación, esixindo que se cubra de forma estable a praza do facultativo recentemente xubilado, que xa levaba varios meses sen exercer.
Tanto desde a Plataforma Sanitaria como desde o Concello, instan á Xerencia a abandonar a precarización da asistencia sanitaria e a substituír as medidas temporais por unha solución definitiva que garanta unha atención médica adecuada para a poboación.