A Mariña Cogami impartiu charla de sensibilización sobre discapacidade a alumnado
![cogami sensibiliza discapacidade colexio Landro Viveiro](https://amarinaxa.com/wp-content/uploads/2022/05/cogami-sensibiliza-discapacidade-colexio-Landro-Viveiro.jpg)
25 escolares de 6º curso de Primaria participaron na xornada de sensibilización que contou cunha charla informativa, a proxección dun vídeo e a experiencia dunha persoa con lesión medular.
A asociación A Mariña Cogami está a levar a cabo unha campaña de sensibilización e prevención de lesión medular que realizou no colexio CPR Landro de Viveiro, na que participaron un total de 25 alumnas e alumnos de 6º de Primaria.
Esta campaña sensibiliza sobre as causas e consecuencias dos accidentes medulares para concienciar sobre a importancia de evitar situacións de risco tanto en estradas como en praias e piscinas, principais focos de sinistralidade entre a mocidade.
Esta sesión informativa contou coa participación da traballadora social da entidade A Mariña Cogami , Patricia Vidal, quen estivo acompañada por Alejandro González, un voluntario da asociación que leva moitos anos colaborando neste programa contando a súa historia persoal.
Dende A Mariña Cogami agradecen a implicación e colaboración da comunidade escolar na difusión desta campaña que intenta crear conciencia entre a xente nova e apostar por unha educación en valores e inclusiva.
Esta é a terceira charla de sensibilización realizada durante este ano na zona da Mariña. As outras dúas anteriores foron en CIFP Porta da Auga de Ribadeo.