A Mariña aposta polo comercio local coa campaña "Merca no teu comercio"
A campaña promocional "Merca no teu comercio" chega este verán a varios concellos da Mariña lucense, entre eles Burela, Xove, O Vicedo, Covas e Cervo, co obxectivo de revitalizar o comercio de proximidade e premiar a fidelidade da clientela. A iniciativa desenvolverase entre o 20 de xullo e o 4 de agosto, e forma parte dun plan conxunto da Federación de Comercio de Lugo, a Federación Galega de Comercio e a Xunta de Galicia, coa colaboración das asociacións de comerciantes de cada municipio.
A proposta enmárcase nunha estratexia máis ampla que inclúe 40 campañas en toda Galicia, 10 por provincia, e que chegará a máis de 90 localidades galegas antes de que remate o ano. No caso da provincia de Lugo, organizaranse 10 accións comerciais en 22 concellos, cunha dotación total de 10.000 euros en premios ata o mes de novembro.
Durante os días que dure a campaña, poderán participar todos os clientes que fagan compras nos establecementos comerciais dos cinco concellos mencionados, rexistrando a súa compra na web da localidade correspondente dentro da plataforma mercanoteucomercio.com, desde calquera dispositivo (móbil, tablet ou ordenador). Como novidade, os propios comerciantes tamén poderán rexistrar a operación, o que duplica as opcións de gañar.
Entre todas as persoas participantes sortearanse 20 tarxetas prepago de 50 euros, o que supón un total de 1.000 euros en premios, que só poderán ser utilizados nos propios comercios locais das localidades participantes. O sorteo realizarase o 5 de agosto, e os galardóns entregaranse na Praza da Mariña o 28 de agosto.
Dende a organización destacan que este tipo de campañas reforzan o tecido económico local, fomentan o consumo responsable e contribúen a dar visibilidade ao comercio tradicional, un sector que segue a ter un papel clave nos municipios máis pequenos. A participación da Mariña nesta acción supón un recoñecemento á súa diversidade comercial e un impulso para que veciños e visitantes aposten polos negocios da contorna.