A Fundación Estaleiros Fra, de San Cibrao, foi declarada de interés cultural
A Consellería de Presidencia, Xustiza e Deportes vén de clasificar como de interese cultural a Fundación Estaleiros Fra Carpinteiro de Ribeira, situada en San Cibrao, adscribíndoa ao protectorado da Consellería de Cultura, Lingua e Xuventude.
A Fundación Estaleiros Fra Carpinteiro de Ribeira foi creada en maio de 2024 para promover, fomentar, recuperar, conservar e desenvolver a carpintería de ribeira, principalmente en Galicia, impulsándoa e desenvolvéndoa cara ao futuro.
Esta iniciativa xurdiu por mor do incendio que sufriu o edificio onde se atopaba a principios de xullo de 2023 e que tivo que ser reconstruído.
O incendio levouse por diante ferramenta, maquinaria e numerosos obxectos de incalculable valor sentimental e patrimonial como planos e maquetas de medio casco que foran construídas pola familia Fra.
A isto engádese que o edificio incendiado formaba parte da identidade do pobo sendo a última carpintería de catro e estando este protexido por Patrimonio pola súa singularidade e valor histórico.
Por outra banda compre dicir que as técnicas construtivas da carpintería de ribeira en Galicia foron declaradas Ben de Interese Cultural en 2015 pola convención da Organización das Nacións Unidas para a Educación, a Ciencia e a Cultura ou UNESCO, para salvagardar o patrimonio cultural inmaterial.