A Foliada Nordestía volverá reunir música e tradición en San Cibrao o 28 de marzo
A Praza dos Campos de San Cibrao converterase o vindeiro 28 de marzo nun dos grandes puntos de encontro da música tradicional e festiva coa celebración dunha nova edición da Foliada Nordestía. O evento, promovido polo colectivo A Rebolaxe coa colaboración do Concello de Cervo e da Vicepresidencia da Deputación de Lugo, reunirá actuacións musicais, cantos de taberna e diversas propostas pensadas para fomentar a participación popular e o ambiente festivo.
A organización comezou xa a desvelar os primeiros nomes do cartel musical. Entre as confirmacións destaca Lamatumbá, unha das formacións galegas máis coñecidas pola súa enerxía sobre o escenario. O grupo chega á cita coa súa nova xira titulada “Lamatumbá… e xa está!”, unha proposta chea de ritmo na que mesturan estilos como o ska, reggae, funky, rock and roll ou cumbia. O seu directo caracterízase pola intensidade e pola capacidade de conectar co público desde o primeiro momento, combinando festa, retranca e tamén mensaxes de carácter social.
Outro dos nomes anunciados é o de Os Carecos, un grupo procedente da comarca do Ortegal que conta cunha sólida traxectoria dentro da música tradicional e festiva galega. A súa presenza promete converter o torreiro nun espazo de baile continuo, cun repertorio pensado para animar a celebración e manter vivo o espírito das foliadas populares.
Completa, polo momento, o cartel confirmado Clan Maragato, unha formación que naceu no seo do grupo Mistura de Lieiro. Parte dos seus integrantes percorreron durante anos distintos escenarios europeos vinculados á música e ao baile tradicional, experiencia que acabou dando lugar a este novo proxecto musical. A súa proposta combina elementos da tradición galega con outras influencias contemporáneas, creando unha mestura que inclúe muiñeiras, folk moderno, metal con protagonismo da gaita, valses pouco convencionais ou mesmo algunhas versións e incursións no blues. Ao longo da súa traxectoria tamén participaron en festivais de referencia dentro do panorama cultural galego.
Ademais dos concertos, a Foliada Nordestía volverá apostar por unha das actividades máis participativas do programa: os Cantos de Taberna. A iniciativa permitirá que diferentes grupos musicais percorran distintos locais da zona interpretando pezas tradicionais e animando o ambiente ao longo da xornada.
O prazo de inscrición para participar nesta actividade permanece aberto e as formacións interesadas poden anotarse enviando un correo electrónico ao enderezo foliadanordestia.cantos@gmail.com. A data límite para formalizar a participación será o 10 de marzo.
Segundo as bases da organización, os Cantos de Taberna comezarán o propio 28 de marzo ás doce do mediodía. Os grupos participantes non terán límite de compoñentes, aínda que deberán acreditarse de forma visible durante a actividade. A recepción das agrupacións realizarase media hora antes, ás 11.30 horas, na Praza dos Campos.
Cada parada da ruta contará con dous grupos que disporán dun tempo total de 45 minutos para actuar, tempo que deberán repartir de mutuo acordo. Ademais, un xurado cualificado visitará os distintos locais para valorar as actuacións e escoller a mellor proposta musical da xornada.
Tras a finalización dos cantos, está previsto un xantar popular, momento no que tamén se dará a coñecer o resultado do concurso e se fará entrega dun trofeo ao grupo gañador.
Con esta proposta, a Foliada Nordestía consolídase como unha das citas culturais e festivas máis destacadas da comarca, combinando música en directo, tradición popular e participación veciñal nunha xornada pensada para celebrar a identidade cultural galega.