A Festa do Percebe de Rinlo volve enxalzar o produto de proximidade
![-presentación-Percebús](https://amarinaxa.com/wp-content/uploads/2024/07/presentacion-Percebus.jpg)
A Festa do Percebe de Rinlo, que terá lugar o 3 de agosto, contará por segundo ano cun servizo de transporte gratuíto desde Ribadeo. Sairá desde a estación de autobuses ribadense entre as 11 e as 15 horas e fará viaxes de volta desde Rinlo entre as oito da tarde e as doce da noite.
“Un ano máis Rinlo vai acoller a gran celebración do percebe, da degustación, da festa e de enxalzar un produto de proximidade, un produto do que detrás hai un sacrificio, hai unha entrega de moitas percebeiras e percebeiros que se dedican e apostan por este medio de vida, pero tamén, sendo conscientes todos, que hai un sacrificio, hai un esforzo e hai unha entrega”, explicou a alcalde, Dani Vega.
O rexedor tamén manifestou que están moi satisfeitos dende o Concello porque “o relevo xeracional existe, está garantido e dende logo nosoutros como Concello, como institución, e tamén a Xunta neste caso, queremos apoialos”. Unha forma tamén é 2poñendo en valor un produto, enxalzando ese produto e degustando o percebe”. De novo aposta por organizala de maneira sostible e segura. “É dicir, o Percebús é un transporte público gratuíto que vai achegar a moitas persoas que aforran de levar o coche para Rinlo e converter Rinlo nun aparcadoiro”.
Deste xeito, “poden deixar o coche con tranquilidade aquí en Ribadeo no entorno da estación de autobuses, e coller o Percebús a partires das 11 da maña ata as 3 da tarde. E despois vai ser desde as 8 da tarde as 12 da noite para volver”. Sairá da estación de autobuses de Ribadeo con punto de chegada e recollida na Avenida de Ribadeo, en Rinlo e despois viaxe de volta desde a Avenida de Ribadeo ata a estación de autobuses da nosa vila.
Para o alcalde “é unha forma, digamos, de darlle ese valor engadido a unha celebración, a unha festa, como é o percebe, de forma segura e sostible, e garantíndolle a todo o mundo poder desfrutar e pasalo ben. Pois, volve o percebe, desfrutemos, pasémolo ben, o vindeiro 3 de agosto en Rinlo. Todos apoiando o percebe, unha forma de vida de tantos percebeiros e percebeiras que escolleron ese medio de vida e tamén garantindo así un relevo xeracional”.
No acto de presentación do Percebús participaron o alcalde, Dani Vega, as concelleiras Begoña Sanjurjo, Elena Sierra e Montse Seijo, así coma representantes da Confraría de Pescadores de Ribadeo e das percebeiras e percebeiros de Rinlo.