A Escudería A Pontenova, recoñecida como a mellor organizadora de probas de montaña de 2025
A Escudería A Pontenova foi distinguida como a mellor organización de probas de montaña do ano 2025 na gala anual da Federación Galega de Automobilismo, celebrada no pavillón Paco Paz de Ourense. O premio foi recollido polo presidente da entidade, Alex Lastra, en representación dun equipo que se consolidou como referente no ámbito do automobilismo galego.
Desde a escudería manifestaron a súa satisfacción por este recoñecemento, que pon en valor o traballo colectivo desenvolvido arredor da súa emblemática subida. “Estamos moi orgullosos deste logro e queremos agradecer a todas as persoas que fixeron posible sacar adiante a proba e acadar este premio, do que todos forman parte”, sinalaron desde a organización, destacando a implicación de voluntariado, colaboradores e afeccionados.
A gala tamén serviu para celebrar os éxitos deportivos da tempada, entre eles o do piloto Ánxel Vizoso, membro da Escudería A Pontenova, que foi felicitado publicamente pola súa destacada actuación ao longo de 2025. Vizoso proclamouse gañador do 20º Volante FGA, un fito que reforza o excelente momento que atravesa o colectivo tanto no eido organizativo como no competitivo.
Este dobre recoñecemento consolida á Escudería A Pontenova como unha das entidades máis activas e prestixiosas do automobilismo en Galicia, combinando unha organización exemplar co talento dos seus deportistas.