A Deputación impulsa o avance administrativo para construír o Centro de Maiores de Ourol
A Deputación de Lugo deu un novo paso decisivo cara á construción do futuro Centro de Atención a Maiores de Ourol, ao aprobar no último pleno unha modificación do convenio interadministrativo co Concello. Esta actualización permite continuar coa tramitación administrativa necesaria para que o proxecto siga avanzando.
O deputado de Promoción Económica e Social, Pablo Rivera Capón, explicou que o convenio inicial contemplaba un investimento de 1,6 millóns de euros, pero o importe final increméntase ata os case 2,3 millóns debido ao cambio de localización da parcela e á finalización do proxecto básico. Este axuste económico fai imprescindible adaptar o acordo entre ambas administracións.
Grazas a esta modificación, tanto a Deputación coma o Concello poderán elaborar e emitir o informe de viabilidade da futura residencia, documento que deberá ser remitido á Xunta de Galicia. A administración autonómica é quen debe outorgar o permiso preceptivo para poder construír o centro. Só unha vez obtida esta autorización, a Deputación estará en condicións de proceder á licitación das obras.
Rivera Capón lembrou que xa no ano 2022, no marco do Plan de Investimentos do Consorcio de Servizos Sociais da Xunta, o Concello de Ourol e a Deputación solicitaron apoio económico para levantar a residencia, pero a petición non foi atendida. O deputado provincial subliñou que, malia non ter competencias legais nin obriga en materia de servizos sociais, a institución provincial sente a responsabilidade de responder ás necesidades da cidadanía: “Non temos esas competencias, pero vemos necesario actuar porque a Xunta non está a dar prioridade á provincia de Lugo”.