A Deputación financiará a rehabilitación da antiga escola de Vilamartín Grande para convertela en local social
A Vicepresidencia da Deputación de Lugo vén de aprobar o convenio de colaboración co Concello de Barreiros para acometer o acondicionamento da antiga escola de Vilamartín Grande, que será transformada nun local social. O acordo, validado este venres pola Xunta de Goberno, inclúe un investimento total de 109.000 euros destinado a recuperar este inmoble construído en 1956 como escola unitaria.
O proxecto prevé unha rehabilitación integral do edificio, con traballos tanto na cuberta como nas paredes exteriores, así como no interior, onde se redistribuirán os espazos e se renovarán por completo as instalacións eléctrica e de fontanería. O obxectivo é poñer en valor un edificio que practicamente quedara sen uso e transformalo nun espazo de convivencia, participación comunitaria e dinamización cultural para a parroquia.
A alcaldesa de Barreiros, Ana Ermida, subliñou que con esta intervención “seguimos na senda iniciada noutras parroquias, poñendo a disposición da veciñanza esas antigas escolas que quedaron en desuso para convertelas en lugares de encontro”. Engadiu que a intención do goberno local é que “calquera persoa, viva onde viva ou teña a idade que teña, dispoña dun espazo próximo onde relacionarse coa comunidade e participar en actividades lúdicas, culturais, sociais ou deportivas”.
Pola súa banda, o deputado de Rural, Daniel García, salientou “a importancia de contar con instalacións de uso social e cultural que axuden a articular a vida comunitaria”, e puxo en valor “a ampla aposta que desde a Vicepresidencia da Deputación de Lugo se está a facer por reforzar estas redes mediante axudas directas ao tecido asociativo e o apoio ás programacións culturais dos pequenos colectivos”.
Ademais da intervención prevista en Vilamartín Grande, o Concello de Barreiros completará a renovación da antiga escola de Vilamartín Pequeno —executada no primeiro semestre deste ano— coa mellora do exterior do inmoble, tamén con apoio económico da Deputación de Lugo.