A Confraría de Pescadores de Burela recibe a autorización para xestionar a nave de redes de arrastre
Portos de Galicia concedeu unha autorización administrativa á Confraría de Pescadores de Burela para a ocupación e xestión da nave de redes de arrastre, unha infraestrutura de titularidade do ente público. A autorización terá unha vixencia de catro anos, con posibilidade de ampliación no caso de que a confraría solicite unha concesión, un título administrativo que lle outorgaría maior estabilidade xurídica.
O acordo inclúe a aplicación da Lei de Taxas de Portos de Galicia, que establece unha exención do 95 % das taxas para a ocupación de edificios destinados a servizos xerais aos usuarios do porto. Deste xeito, a Confraría de Pescadores de Burela pagará unha taxa anual de 70 euros polo uso dos máis de 350 metros cadrados de superficie que ocupa o inmoble.
Esta medida busca facilitar a actividade pesqueira no porto de Burela, garantindo que os profesionais do sector dispoñan das instalacións necesarias para o seu labor diario en condicións óptimas.