A Confraría de Pescadores de Burela pon en valor a cultura mariñeira no marco do seu centenario
A Confraría de Pescadores de Burela organizou unha xornada divulgativa para celebrar o seu centenario, baixo o título Ao Son do Mar. A actividade centrouse na conexión entre a cultura mariñeira e a música tradicional, un patrimonio que tamén forma parte da identidade marítimo-pesqueira da localidade. Durante o evento, distintas bandas tradicionais de Burela, como a Banda Santo Inocencio, Acordeonistas da Mariña Burela, Ledicia SCR, ACM Dambara Burela e ACM Arume Burela, encheron o ambiente co son de acordeóns, recordando os tempos nos que a música servía de entretemento para os mariñeiros nas súas longas xornadas no mar.
A xornada destacou tamén polo seu carácter interxeracional, reunindo a persoas maiores e mozas para compartir experiencias relacionadas co traballo no mar. Os vellos lobos de mar tiveron a oportunidade de narrar as súas aventuras aos máis novos, co obxectivo de inspirarlles a ver no sector pesqueiro unha oportunidade profesional e contribuír a resolver o problema do relevo xeracional no ámbito marítimo.
Esta actividade forma parte do proxecto Actividades Centenario Confraría de Pescadores de Burela, que busca divulgar a cultura mariñeira, visibilizar o papel das mulleres no sector, fomentar a integración social e poñer en valor o traballo social desenvolvido pola Confraría ao longo dos seus 100 anos de historia. O proxecto conta co apoio do programa FEMPA da Consellería do Mar e foi xestionado polo GALP A Mariña-Ortegal.