A Comisión de Festas lanza un calendario solidario para financiar celebracións
A Comisión de Festas de San Estevo do Vicedo xa ten listo o calendario oficial de 2026, unha iniciativa que regresa un ano máis como ferramenta de financiamento e como homenaxe á propia comunidade. O colectivo anuncia que o calendario xa pode solicitarse mediante mensaxe directa ou a través de calquera membro da comisión, e que nas vindeiras datas se informará dos establecementos colaboradores onde estará dispoñible para a súa venda.
O novo almanaque destaca pola súa forte vinculación coa xente do municipio. As páxinas inclúen fotografías cedidas por veciñas e veciños, imaxes cheas de lembranzas e momentos especiais que, segundo a organización, “reflicten a identidade, a historia e o afecto que a xente do Vicedo sente polo seu territorio”.
O prezo do calendario será de 10 euros, unha achega que se destinará integramente á organización das festas na honra de Santo Estevo e Santa Lucía, dúas citas tradicionais que cada ano reúnen a ducias de persoas e que precisan dunha ampla colaboración para seguir medrando.
A comisión agradece “a todas as persoas que quixeron formar parte do proxecto, especialmente a quen compartiu as súas fotos máis queridas”, e anima á veciñanza a apoiar esta iniciativa que combina memoria, identidade e celebración.