A CIG-Saúde denuncia derivacións forzadas de pacientes do Hospital da Mariña ao HULA
A CIG-Saúde volveu cargar contra a situación sanitaria da Mariña ao denunciar que, a pesar de existir camas libres no Hospital da Mariña, pacientes que precisan ingreso están a ser derivados cara ao HULA por orde da Dirección. Segundo o sindicato, estes traslados realízanse contra o criterio do persoal médico e tamén contra a vontade das persoas usuarias, debido á incapacidade da equipa directiva para dotar ao centro dos profesionais necesarios.
A central sindical cualifica de “pésima planificación” o peche da planta de Medicina Interna, con 38 camas inoperativas durante os meses de xullo, agosto e setembro. Xa advertiran desta decisión o pasado 11 de xuño, asegurando que carecía de xustificación técnica. Por iso convidan á directora xerente e aos responsables políticos a dar explicacións públicas ás e aos pacientes que son obrigados a ingresar en Lugo tendo camas dispoñibles no seu hospital de referencia. “Mentres a fachada dá a impresión de modernización e crecemento, o que hai detrás é un hospital desmantelado pola falta de persoal”, sosteñen.
O sindicato tamén alertou sobre a utilización de ambulancias colectivas para trasladar grupos de pacientes. O pasado luns 25 de agosto, segundo a información facilitada, catro persoas foron derivadas nun mesmo vehículo ao HULA, acompañadas por unha única enfermeira. Estas ambulancias, lembran, están pensadas para transporte ordinario de rehabilitación ou diálise, non para ingresos hospitalarios, e xa foran empregadas do mesmo xeito no mes de marzo.
Para a CIG, esta práctica supón unha clara degradación da atención sanitaria na comarca. “A consecuencia directa das políticas laborais da Xunta do PP é que hoxe non hai persoal suficiente para cubrir as necesidades básicas de saúde da Mariña. Os pacientes que deberían estar ingresados no seu hospital teñen que desprazarse a máis de 100 quilómetros, arrastrando ás súas familias”, insisten.
Desde a organización nacionalista conclúen que seguirán berrando contra o desmantelamento sanitario: “Prometeron máis e mellores servizos, pero o que temos son menos recursos, máis derivacións e a imposibilidade de garantir unha sanidade digna, equitativa e próxima ás veciñas e veciños da Mariña”.