A CIG mobilízase en Burela polo 8M para reclamar igualdade laboral
A CIG A Mariña mobilizouse este 8 de marzo en Burela para reivindicar a igualdade no ámbito laboral baixo o lema “Traballo, Igualdade, Salarios dignos. Galiza con Dereitos”. A concentración tivo lugar diante do Concello, onde numerosas mulleres reclamaron medidas contra a discriminación de xénero no traballo.
A central sindical denunciou que as desigualdades non só persisten senón que se agravan. Entre os problemas destacados atópanse a contratación precaria, a infravaloración dos sectores feminizados, a falta de permisos remunerados suficientes para a conciliación, as dificultades para acadar unha pensión digna e os recortes en servizos esenciais como a sanidade e a educación.
Durante a protesta, a CIG lembrou que a fenda salarial segue en valores elevados, cunha diferenza do 18,4% en 2023. Ademais, a maioría dos contratos fixos-descontinuos e a tempo parcial afectan ás mulleres, moitas veces porque non atopan empregos a xornada completa ou deben atender persoas dependentes.
A precariedade laboral e a falta dun sistema público de coidados obrigan a moitas mulleres a abandonar o mercado de traballo, perpetuando a desigualdade. A carestía da vida, sumada á temporalidade e á discriminación salarial, sitúa as taxas de pobreza feminina en niveis preocupantes.
A mobilización en Burela puxo de manifesto a necesidade de políticas activas que garantan a igualdade real e efectiva no ámbito laboral en Galicia.