A CIG denuncia o abandono do servizo de Dixestivo do Hospital da Mariña
Xa en agosto de 2024, dende CIG Saúde denunciaban que o Hospital da Mariña estaba tan só dotado con dúas facultativas especialistas en aparello dixestivo. "A data de 1 de febreiro do 2023, unha soa dixestóloga quedaba ao fronte do servizo", afirman. A día de hoxe e, pasado ano e medio, considera que a situación segue sendo a mesma cunha soa dixestóloga á fronte dun servizo que "grazas ao esquecemento dos dirixentes da sanidade galega, é incapaz de atender ás demandas sanitarias da cidadanía da Mariña".
Segundo a central nacionalista, o hospital da Mariña debera estar dotado de cando menos catro médicos especialistas en dixestivo para cubrir as necesidades dunha Comarca con mais de 72.000 habitantes e poder ofertar un servizo de calidade cubrindo as seguintes necesidades: manter activa unha consulta diaria; realizar as probas terapéuticas e as diagnosticas do aparello dixestivo das prioridades 1, 2 e 3; asumir patoloxías tumorais do aparello dixestivo; ter a cargo pacientes de dixestivo ingresados; realizar o cribado de cancro colorectal dos pacientes da Mariña; participar nos ensaios clínicos para acadar un nivel óptimo de experiencia e dar visibilidade ao Centro Hospitalario; e asumir o cadro de gardas hospitalarias.
CONSECUENCIAS
Dende CIG Saúde explican de novo que "cun só unha dixestóloga é imposible atender unha consulta diaria, pacientes ingresos na planta, facer as probas diagnósticas máis as terapéuticas do aparello dixestivo e asumir o cadro de gardas hospitalarias".
Reivindican que o Hospital da Mariña non pode asumir ingresos da especialidade de Dixestivo, tendo que asumir a especialidade de Medicina Interna ditos ingresos; non se pode asumir unha consulta diaria pasando a ter unha consulta á semana; diminúe a capacidade para asumir probas e aumenta significativamente o tempo para a realización das mesmas; derívanse ás clínicas privadas de Lugo un gran número de probas diagnosticas de pacientes con prioridade 2 e 3, (no que vai de ano preto de 300 pacientes derivados á privada); hai un incremento das lista de agarda con pacientes con máis dun ano de espera; ao día seguinte ás gardas hospitalarias (24 horas de traballo continuado) suspendese toda actividade do servizo por descanso da única dixestóloga.
Para a CIG-Saúde da mariña este é outro exemplo más do "abandono absoluto" no que se atopa o Centro Hospitalario e a veciñanza da Mariña por parte da Consellería do Sergas coa complicidade do Xerente da Área Sanitaria de Lugo e da Dirección do Hospital da Mariña, provocando longas listas de espera, atrasos nos diagnósticos e derivacións de pacientes da Mariña aos hospitais privados de Lugo, a mais de 100 quilómetros de distancia. Trasladan: "Ante isto voltamos preguntar se son estes os máis e mellores servizos que o Partido Popular anunciou ata a saciedade para o Hospital da Mariña e se esta é a sanidade que se merecen as e os Mariñáns".