A Casa da Xuventude de Burela convértese nun espazo de creación musical con Grande Amore
A Casa da Xuventude de Burela acollerá os vindeiros 15 e 16 de abril un Obradoiro de Produción Musical, unha iniciativa dirixida a mozos e mozas de entre 15 e 30 anos que busca fomentar a creatividade a través da música. A actividade, organizada pola área de Mocidade do Concello de Burela, será totalmente gratuíta e desenvolverase en horario de 10:00 a 13:00 horas.
O encargado de impartir o obradoiro será Nuno Pico, coñecido artisticamente como Grande Amore, un referente da música galega actual. Durante as sesións, traballará co grupo participante para dar forma a unha composición inspirada nos textos creados previamente nos Obradoiros de Escrita Creativa con Antía Yáñez.
A iniciativa parte dun proxecto colaborativo que pon en valor a expresión artística da mocidade. “Nos Obradoiros de Escrita Creativa con Antía Yáñez saíron textos nos que os rapaces e rapazas reflexionaban sobre Burela, e agora Grande Amore recolle esa mensaxe para transformala nun tema musical. A idea é que esta canción poida converterse nun himno para a vila”, explica Mario Pillado, tenente de alcaldesa.
As persoas interesadas en participar poden obter máis información e inscribirse a través do teléfono 982 581 154, do correo electrónico casaxuventude@burela.org ou de maneira presencial na Casa da Xuventude.
Dende o Concello de Burela esperan que esta proposta sexa ben recibida pola mocidade e animan a todas as persoas interesadas a participar. “Agardamos que a actividade sexa do agrado da rapazada e que se animen a formar parte deste proxecto musical. Tamén queremos agradecer tanto a Antía Yáñez como a Nuno Pico a súa implicación e compromiso coa idea que lles plantexamos e a súa total disposición a colaborar”, conclúe Pillado.