A cabalgata de Alfoz finalizará no Castelo do Castrodouro con merenda
O Concello de Alfoz prepara unha celebración especial para recibir aos Reis Magos o vindeiro 5 de xaneiro de 2025. A cabalgata dará comezo ás 16.00 horas na Casa da Cultura e percorrerá diferentes puntos do municipio, como igrexas e escolas, antes de rematar no emblemático Castelo do Castrodouro ás 18.00 horas.
Durante o percorrido, as súas maxestades visitarán diversas localizacións de Alfoz, onde terán a oportunidade de achegarse aos veciños e recoller as cartas dos nenos e nenas. Ao rematar a ruta, no Castelo do Castrodouro, celebrarase un encontro especial no que os asistentes poderán desfrutar dunha merenda con chocolate quente e biscoitos, nun ambiente cheo de ilusión e maxia.
Esta actividade está organizada pola Asociación Xuvenil e Cultural Castro de Ouro, en colaboración co Concello de Alfoz, co obxectivo de ofrecer un día inesquecible para toda a familia.