A Banda Municipal de Música de Ribadeo levará o espírito de Viena ao seu concerto de Nadal
A Banda Municipal de Música de Ribadeo celebrará o seu tradicional concerto de Nadal o sábado 27 de decembro, ás 20:00 horas, no auditorio municipal Hernán Naval. A actuación, titulada Aquí como en Viena, contará con entrada gratuíta ata completar o aforo e converterase, un ano máis, nunha das citas culturais máis destacadas destas datas na vila.
O director da formación ribadense, David Ballester Martínez, explica que este concerto é xa unha tradición inseparable do Nadal en Ribadeo. Segundo detalla, o programa estará dividido en dúas partes ben diferenciadas: unha primeira sección con pezas propias destas festas, de carácter máis alegre e celebrativo, e unha segunda parte que fará unha clara homenaxe ao famoso concerto de Aninovo de Viena, coa interpretación de valses e polcas tan recoñecibles para o público.
Ballester subliña tamén que esta actuación servirá para presentar sete obras novas no repertorio da banda, unha aposta pola renovación musical que busca sorprender e facer gozar ao público que cada ano se achega a escoitar á Banda Municipal. Con este concerto, a formación reafirma o seu compromiso coa difusión da música e coa creación dun espazo cultural aberto e accesible para toda a veciñanza durante o Nadal.