A aula CeMIT de Barreiros acollerá unha proba oficial para obter a certificación dixital ComDix
A aula CeMIT do Concello de Barreiros será unha das sedes nas que se desenvolverán as probas presenciais para obter a certificación galega en competencias dixitais ComDix, unha acreditación promovida pola Administración autonómica que permite validar os coñecementos e habilidades no uso das tecnoloxías dixitais.
O proceso de inscrición para participar nestes exames abrirase este luns, 16 de marzo, e permitirá que as persoas interesadas poidan presentarse ás probas que se celebrarán a finais do mes de abril en 49 localidades de toda Galicia.
No caso de Barreiros, o exame correspondente ao nivel intermedio terá lugar o mércores 29 de abril ás 10:00 horas na aula CeMIT situada no Teleclub de San Cosme. Para poder participar na proba será necesario realizar previamente a inscrición a través da páxina web da Rede CeMIT, cemit.xunta.gal, antes de que remate o prazo establecido, fixado para o 25 de marzo.
A certificación ComDix constitúe unha ferramenta oficial para acreditar as competencias dixitais das persoas usuarias, tanto no ámbito persoal como profesional. Esta acreditación está baseada no Marco Europeo de Competencias Dixitais (DigComp), que establece os estándares para avaliar o coñecemento e a capacidade de manexo das tecnoloxías da información e da comunicación.
A través desta certificación, os participantes poden demostrar a súa capacidade para utilizar dispositivos e ferramentas dixitais, xestionar información en liña, comunicarse en contornos dixitais ou aplicar solucións tecnolóxicas en diferentes ámbitos da vida cotiá e laboral.
Toda a información relativa á convocatoria, así como os requisitos necesarios para participar e os detalles sobre o procedemento de inscrición, poden consultarse na páxina web oficial da Rede CeMIT.
Desde o Concello de Barreiros salientan a importancia de que o municipio continúe formando parte das sedes nas que se realizan este tipo de probas oficiais. Segundo indican, esta iniciativa permite achegar oportunidades de formación e acreditación á veciñanza, facilitando o acceso a estas probas sen necesidade de desprazarse a outros concellos.