A asociación musical Melomanía abre o prazo de matrícula para o curso 2025-2026
A asociación musical Melomanía, integrada por alumnado adulto do Conservatorio de Música de Viveiro e presidida por Mario Vale, vén de anunciar a apertura do prazo de inscrición para o curso 2025-2026. As persoas interesadas poderán formalizar a matrícula entre o 8 e o 12 de setembro, ambos días incluídos, no salón de actos do Conservatorio en horario de 11:00 a 13:30 horas. Quen non poida acudir nese tramo poderá obter información na secretaría do centro ou chamando ao teléfono 982 560 486.
A programación deste curso inclúe un amplo abano de materias: acordeón, batería, canto, clarinete, gaita, guitarra, guitarra eléctrica, baixo eléctrico, piano, saxofón, linguaxe musical, coro e edición de partituras co programa Sibelius. As clases de linguaxe musical, Sibelius e coro serán colectivas, mentres que as de instrumento se impartirán de maneira individual con horarios adaptados ás necesidades de cada alumno. Como principal novidade, a asociación incorpora nesta ocasión clases de violín e viola.
Con arredor de 130 asociados, Melomanía leva funcionando desde o curso 2008-2009 e converteuse nun referente local pola súa capacidade para fomentar a práctica musical en adultos. No seu seo naceron diferentes agrupacións corais e instrumentais, espazos nos que o alumnado pode amosar os coñecementos adquiridos. Entre elas destacan o Coro de Adultos do Conservatorio, a orquestra Trova da Mariña, o grupo de gaitas Amigos do folk e varias formacións de pop-rock como Jamape, Fervenza 00 ou Sen límites.