A Asociación de Veciños de San Sebastián de Carballido celebra a 'Presi Fest'
A Asociación de Veciños de San Sebastián de Carballido (Alfoz) celebra a 'Presi Fest' este venres 6 de decembro. Trátase da festa o 74 aniversario de Jesús Paz, presidente da entidade desde a súa fundación.
"El, xunto cos seus compañeiros de directiva e amigos decidiron celebrar esta data cun día completo de festa no que non faltará a música e a boa gastronomía", indican desde a Asociación. A celebración comezará xa pola mañá con sesión vermú e aperitivos. Logo, a xente anotada para o xantar degustará un menú composto de langostinos e o famoso churrasco cociñado polo homenaxeado coa súa receita máxica e a correspondente tarta de aniversario.
Para rematar o día, xa dende a tarde ata ben entrada a noite contarán coa actuación musical do gran “Celsa’s John”. Esta cita tamén lles servirá aos membros da Asociación para perfilar detalles dos próximos eventos, que xa teñen prácticamente planificados, e que en breve irán facendo públicos os carteis de cada un deles: unha actividade centrada no público infantil (31 de decembro), a Festa do San Sebastián (18 e 19 de xaneiro), a Feira do Trece (14 de xuño) e a Festa do San Roque (16,17 e 18 de agosto).