A Asociación de autónomos e pequenas empresas de Galicia organiza unha sesión informativa do programa 'Adapta Local'

Adapta Local, que terá lugar ás 20.30 horas na Sala de Exposicións da biblioteca municipal de Viveiro, é un programa formativo destinado a iniciativas do comercio local e rural galego

A Asociación de autónomos e pequenas empresas de Galicia organiza o vindeiro luns 28 de outubro, en colaboración ca Asociación de comerciantes do Centro Histórico de Viveiro unha sesión informativa do programa 'Adapta Local'.

Adapta Local, que terá lugar ás 20.30 horas na Sala de Exposicións da biblioteca municipal de Viveiro, é un programa formativo destinado a iniciativas do comercio local e rural galego, que pon o foco nas iniciativas innovadoras que potencien a comercialización do produto galego de forma sustentable e competitiva.

Os obxectivos do programa son consolidar a renovación tecnolóxica que viu o mercado galego, impulsar o comercio con estratexias de comercio intelixente no centro do seu modelo de negocio, e potenciar un comercio dinámico que procura a excelencia e a mellora continua.

“O comercio é un sector estratéxico para a economía española e constitúe un elemento crave de vertebración territorial e dinamización da actividade social, económica e cultural. Para que o sector do comercio poida facer fronte a os retos derivados da aceleración da transformación dixital ,é necesario dotalo de ferramentas, plataformas, servizos dixitais de última xeración e impulsar a súa capacidade de innovación", explican.

Proponse situar as novas fórmulas de comercialización a través de medios dixitais como base da estratexia para engadir valor adicional ao cliente final. Isto implica que servirán como apoio ás fortalezas do comercio galego de proximidade: produto local, trato personalizado e distribución áxil. Por iso, as novas fórmulas de comercialización e a innovación en técnicas para a venda son necesarias e preséntanse como unha oportunidade para o crecemento dos sectores de comercio local e rural.

O obxectivo é adaptar o comercio de proximidade ós cambios de hábitos dos consumidores apostando pola dixitalización e a sustentabilidade. Viveiro é unha praza comercial referente en tódala comarca, con gran variedade de negocios que atraen a clientes tanto da zona da Mariña como do Ortegal.

O Centro Comercial histórico, no seu afán de xerar un sector comercial cada vez máis competitivo únese a este tipo de iniciativas para que os negocios asociados teñan tódalas ferramentas necesarias ó seu alcance para lograr este obxectivo.