A Asociación Amado Lar celebrará a súa mostra folclórica cun adianto do seu 40 aniversario
A Asociación Cultural Amado Lar, en colaboración co Concello do Valadouro, volverá encher de tradición e festa a Praza de Santa María coa celebración da XXXV Mostra Folclórica, que terá lugar o domingo 31 de agosto a partir das 19:00 horas. A cita, xa consolidada como prólogo das Festas do Oito, reunirán unha vez máis a veciñanza arredor da música e do baile popular.
O grupo anfitrión compartirá escenario coa Agrupación Folclórica O Arco da Vella, de San Miguel de Reinante (Barreiros), nun encontro no que non faltará o ambiente festivo nin tampouco as sorpresas. Coincidindo cos seus corenta anos de traxectoria, a asociación anfitrioa realizará durante o acto un pequeno recoñecemento conmemorativo que servirá como preludio das celebracións previstas para decembro.
Ademais da música e da danza, o público terá a oportunidade de participar no sorteo de dous décimos da Lotería de Nadal e dunha pandeireta. As rifas estarán dispoñibles durante a propia actuación. No caso de que a meteoroloxía non acompañe, a organización xa anunciou que o evento se trasladará á Casa da Cultura.
Desde a Asociación Cultural Amado Lar convidan a todas as persoas a achegarse para desfrutar dun serán que mestura tradición, identidade e celebración colectiva, mantendo viva a esencia das raíces culturais da comarca.