A artesanía toma os Xardíns Noriega Varela coa 41ª edición da feira de Viveiro
Viveiro converterase, unha vez máis, nun punto de encontro esencial para os amantes da artesanía coa celebración da cuadraxésimo primeira edición da súa Feira de Artesanía. A cita terá lugar entre o 8 e o 17 de agosto nos Xardíns Noriega Varela, e ofrecerá unha ampla representación de oficios tradicionais, combinados con propostas máis contemporáneas.
A feira, impulsada polo Concello de Viveiro e a Asociación Proa, conta co apoio da Deputación de Lugo e da Xunta de Galicia. A inauguración oficial será o xoves 8 ás 17:30 horas. Un dos atractivos principais deste ano será o espazo «Encontros», un posto específico no que se realizarán demostracións en vivo de distintos oficios ao longo de toda a semana.
Nesta edición participarán preto de corenta obradoiros artesáns procedentes de diferentes puntos, cunha mostra variada de técnicas, materiais e estilos. A programación das demostracións comezará o sábado 9 cunha exhibición de cantería (de 17:30 a 21:30 horas). O domingo 10 será a quenda do cartón pedra, no mesmo horario. O luns 11 está prevista unha sesión doble de gravado en vidro (de 11:00 a 14:30 e de 17:30 a 22:00 horas).
A actividade continuará o xoves 14 coa cestería (de 11:30 a 13:30 e de 18:00 a 20:00) e o venres 15 cos instrumentos musicais artesáns, tamén en dúas sesións. Nesa mesma xornada, a sala do Conservatorio acollerá unha exhibición de palilleiras entre as 11:00 e as 18:00 horas. O sábado 16 será a quenda do fiado con roca, mentres que o domingo 17 pechará o programa unha demostración de bonequería.
Ademais, no día da apertura, o posto «Encontros» acollerá tamén un espazo da Comisión de Festas de San Roque, que ofrecerá material promocional das súas actividades. O cartel da feira foi elaborado polo artista Neira Brochs.
Durante a presentación do evento, a alcaldesa de Viveiro, Mariña Gueimunde, destacou o valor cultural e social da feira: «A artesanía é parte da nosa identidade como pobo e esta feira permite conectar tradición e creatividade, dándolle ao público a oportunidade de coñecer en directo como se elaboran pezas únicas». Tamén sinalou a importancia do evento como espazo de diálogo entre xeracións e como motor para dar visibilidade ao traballo das persoas artesás.