A arte íntima e naturalista de Gonzalo López-Abente chega ao Vicedo
O Concello do Vicedo converte a súa Casa da Cultura nun espazo para a pintura de autor coa mostra “Retratos e paisaxes”, unha escolma de acuarelas do artista Gonzalo López-Abente. A exposición poderá visitarse de balde entre os días 21 e 29 de xullo, en horario de mañá e tarde, de 10 a 14 horas e de 19 a 21 horas.
A mostra inclúe obras nas que o artista combina o retrato humano —intenso, expresivo, cheo de matices— con paisaxes cotiás da Mariña lucense. A través da técnica da acuarela, López-Abente consegue transmitir emoción, realismo e unha fonda conexión co territorio. Os seus traballos destacan polo uso da luz e da cor, así como pola proximidade cos rostros e lugares representados.
Desde o Concello do Vicedo convidan a toda a veciñanza e visitantes a achegarse á exposición, que “permite gozar da obra dun pintor comprometido coa beleza do que nos rodea e coa mirada sincera sobre as persoas”.