90 operarios e 28 quitaneves e vehículos da Deputación de Lugo seguen mobilizados para garantir a seguridade
A Deputación de Lugo mantén despregado un dispositivo composto por 90 operarios, e 28 quitaneves e vehículos para garantir a seguridade e atender as incidencias no temporal de neve e acumulación de xeo producido nas últimas horas.
O dispositivo traballa en máis de 100 estradas que discorren por 22 municipios de toda a provincia que afecta ás comarcas da Montaña, A Chaira, e A Mariña, xa que a circulación nestas vías está a ser complicada polas intensas nevadas das últimas horas, que acumulan espesores de ata 25 centímetros nos puntos máis altos da Montaña, como é o caso de Cervantes.
As estradas afectadas discorren polos seguintes concellos: Baleira, Becerreá, Folgoso do Courel, Fonsagrada, Cervantes, O Incio, Navia de Suarna, Negueira de Muñiz, As Nogais, Pedrafita do Cebreiro, Quiroga, Ribas de Sil, Samos, Triacastela, Muras, Vilalba, Ourol, Taboada, A Pontenova, O Saviñao, Chantada e Baralla.
O dispositivo de seguridade mobilizado pola Deputación está formado por 90 operarios, 28 máquinas quitaneves, 3 tractores especiais con saleiro e cuña quitaneves, 8 pickup con saleiro e cuña quitaneves, e 12 vehículos todoterreo de apoio dotados do material necesario para atender calquera incidencia e facilitar o paso de maquinaria pesada.
Os 12 silos de sal da Deputación dispoñen de 35 toneladas cada un para conseguir desfacer as placas de xeo que hai no firme e favorecer así a seguridade dos usuarios das vías.