Marco Díaz Carril leva o primeiro premio provincial do Certame de Poesía Infantil de Nadal
O Concello de Barreiros fixo pública a súa felicitación a Marco Díaz Carril tras proclamarse gañador do Certame de Poesía Infantil de Nadal 2025, un recoñecemento que acadou primeiro na fase local celebrada no municipio e que máis tarde ampliou coa súa vitoria na fase provincial convocada pola Biblioteca Pública de Lugo.
O novo autor destacou inicialmente na convocatoria organizada en Barreiros, onde o seu traballo foi seleccionado para representar ao concello na seguinte rolda do certame. Xa no ámbito provincial, a súa creación literaria volveu convencer ao xurado, que decidiu outorgarlle o primeiro premio entre as propostas presentadas por participantes doutros puntos da provincia.
Desde o Concello subliñaron que este éxito “enche de orgullo á comunidade” e serve para poñer en valor a importancia de fomentar a expresión escrita desde idades temperás. A administración local destacou o papel fundamental das familias, dos centros educativos e das bibliotecas como espazos nos que se cultiva a creatividade e se impulsa o gusto pola lectura e pola escritura.
A entrega oficial de premios celebrarase o mércores 25 de febreiro de 2026, ás 18.00 horas, no salón de actos da Biblioteca Pública de Lugo, nun acto no que se recoñecerá o talento das nenas e nenos participantes e se fará entrega das distincións correspondentes.
O Concello quixo tamén facer extensiva o seu parabén a todos os rapaces e rapazas que formaron parte do certame, salientando o esforzo, a ilusión e a capacidade imaxinativa demostrada nos textos presentados. Ao mesmo tempo, animaron á cativada a continuar escribindo, creando e soñando, convencidos de que iniciativas deste tipo contribúen a fortalecer o tecido cultural desde a base.
Con este premio, Marco Díaz Carril convértese nun exemplo do potencial creativo que medra en Barreiros e nun referente para outros mozos e mozas que atopan na poesía unha vía para expresar emocións, vivencias e inquedanzas.