A Sala Bahía converterase nun club de jazz e rock este sábado en Foz
A Foz vivirá este sábado unha velada diferente coa transformación da Sala Bahía nun auténtico club de jazz e rock. O Concello e a Escola Municipal de Música Arcadio Mon impulsan esta proposta cultural que terá lugar o 21 de febreiro ás 21.30 horas e que promete converter o espazo nun punto de encontro para os amantes da música en directo.
A protagonista da noite será a aula de música moderna da escola, que subirá ao escenario cun repertorio variado no que terán cabida sons de blues, jazz, rock e pop. O público poderá escoitar diferentes estilos e formacións nun espectáculo que busca amosar o traballo desenvolvido ao longo do curso polo alumnado, así como a súa evolución artística.
Co obxectivo de recrear o ambiente característico dos clubs musicais, a Sala Bahía contará cunha disposición especial de mesas e cadeiras, ademais de servizo de barra. Deste xeito, as persoas asistentes poderán gozar dun refresco mentres seguen as actuacións, nun formato máis próximo e acolledor que convida a deixar atrás a rutina e mergullarse na experiencia sonora.
Desde o goberno local salientan que esta cita forma parte da programación cultural que busca dinamizar a vida social do municipio e ofrecer espazos de expresión para o talento novo. O alcalde, Fran Cajoto, destacou que a Escola de Música de Foz “ten un ambiente especial que se percibe en cada concerto”, poñendo en valor a implicación do profesorado e a ilusión do alumnado.
A organización anima á veciñanza e ás persoas da contorna a achegarse para compartir unha noite marcada polo ritmo, a improvisación e a enerxía do directo, nunha proposta que combina aprendizaxe e espectáculo e que reafirma o compromiso de Foz coa cultura musical.